.png)
Շագանակագեղձի բարորակ և չարորակ հիվանդությունները տղամարդկանց շրջանում ամենահաճախ հանդիպող խնդիրներց են:
«Միքայելյան» համալսարանական հիվանդանոցի Ուրոլոգիայի կլինիկայի բժիշկ-ուրոլոգ Գագիկ Նազարյանը նշում է, որ շագանակագեղձի բարորակ հիպերպլազիան (ադենոմա), շագանակագեղձի տրանզիտոր զոնայում հիպերպլաստիկ պրոցեսների հետևանքով բջիջների քանակի ավելացումն է, ինչի հետևանքով առաջանում է միզուկի լուսանցքի ճնշվածություն:
Հավաստի ռիսկի գործոններն են՝
- տարիքը,
- ժառանգականությունը,
- տարիքային հորմոնալ փոփոխությունները,
- վնասակար սովորությունները,
- գիրությունը և այլն:
Ախտանիշներն են՝
- մեզի շիթի թուլացում
- միզապարկի կիսադատարկման զգացողություն
- հաճախամիզություն՝ հատկապես գիշերային ժամերին
- ակամա միզարձակություն
- ընդհատվող միզարձակություն։
Ավելի ուշ փուլերում առաջանում են բարդություններ, ինչպիսիք են սուր միզակապությունը, վերին և ստորին միզուղիների բորբոքային հիվանդությունները, հիդրոնեֆրոզը(վերին միզուղիներից մեզի արտահոսքի խանգարում), միզաքարային հիվանդությունը, երիկամային անբավարարությունը և այլն:
Բժշկի խոսքով՝ շագանակագեղձի քաղցկեղը տարածվածությամբ և մահացությամբ տղամարդկանց մոտ գրավում է 2-րդ տեղը՝ չարորակ ուռուցքների շրջանում: «Հիվանդության առանձնահատկություններից մեկն այն է, որ սկզբնական շրջանում գանգատները սպեցեֆիկ չեն ու նման են շագանակագեղձի այլ պաթոլոգիաների ախտանիշներին: Ուռուցքը ունի խիտ արյունամատակարարում, այդ իսկ պատճառով վաղ մետաստազավորվում է, ի հայտ բերելով ավելի ուշ փուլերին բնորոշ գանգատներ՝ արյունամիզություն, ցավեր շեքի, ողնաշարի, վերջույթների շրջանում»,-ասում է Գագիկ Նազարյանը:
Բժիշկ-ուրոլոգի խոսքով՝ շագանակագեղձի և՜ բարորակ, և հատկապես չարորակ պաթոլոգիաների դեպքում լիարժեք բուժման լավագույն գրավականը ժամանակին կատարված ախտորոշումն է և բուժման մեկնարկը հիվանդության ամենավաղ փուլերում: Այս իսկ պատճառով 45տ. լրացած տղամարդկանց խորհուրդ է տրվում տարեկան 1 անգամ անցնել ուրոլոգի խորհրդատվություն, անհրաժեշտության դեպքում կատարել բժշկի կողմից ցուցված հետազոտությունները՝ ՊՍԱ քննություն (շագանակագեղձի ուռուցքային մարկեր), շագանակագեղձի մատնային քննություն, որովայնի և փոքր կոնքի սոնոգրաֆիկ և ՄՌՇ քննություններ, ուրոդինամիկ հետազոտություններ:
«Շագանակագեղձի քաղցկեղով հիվանդներին բուժելիս ցուցաբերվում է մուլտիդիսցիպլինար մոտեցում՝ հիվանդանոցում գործող օնկոլոգիայի կլինիկայի բժիշկների հետ համատեղ: Իրականացվում է թե կոնսերվատիվ, թե վիրահատական բուժում։ Կատարվում են արմատական վիրահատություններ՝ բաց և լապարասկոպիկ եղանակներով, վիրահատություններ կատարելիս նախապատվությունը տրվում է էնդոսկոպիկ մեթոդներին»,-ասում է Գագիկ Նազարյանը՝ խորհուրդ տալով ազատվել վնասակար սովորություններից, վարել առողջ ապրելակերպ, պարբերաբար հետազոտվել, քանզի հիվանդության վաղ ախտորոշումն ապահովում է բուժման լիարժեքությունը:
